“E situacion regional di Aruba ta mas peligroso cu nunca. Nicolas Maduro no por bay contra ningun decision di e grupo Chavista cu a permiti Nicolas bira lider di Venezuela, cu ta directamente mara na Cuba y na Rusia.”

Na momento cu e crisis na Ukraine a haya su inicio, riba e prome dia di reportahe di e desaroyo mundial nobo, DIARIO a adverti cu los for di e situacion militar, mester mira e desaroyo mundial economico, cu a kibra tur barera di ideologia politico internacional.

E cooperacion directo entre comunismo y mundo liber den e economia mundial prome cu e confrontacion na Ukraine a cuminsa, ta nifica cu si paisnan liber mishi cu interesnan economico di paisnan economista, e por bira un asina yama “tiro pa culata” pa e paisnan di mundo liber.

Advertisement

Esaki ta e problema grandi rond mundo, cu mester crea aliansa nobo of fortalece e cooperacion entre paisnan di mes bloke, pa por sobrevivi e situacion comercial mundial actual.

For di momento cu Venezuela a asumi e posicion di dictadura, medidanan economico a wordo tuma contra Venezuela, cu a dicidi pa Chavismo.

Venezuela a dicidi pa comunismo, cu a deshaci di e interes di cantidad di empresa liber riba tereno economico pero tambe a conoce un epoca di milatarismo nobo.

Pa deshaci di pensamentonan sumamente peligroso cu ta wordo crea na e momentonan aki, mester comprende con e medidanan contra Venezuela (mescos cu tin y ta wordo reforsa contra Cuba) ta afecta comercio y entrada financiero di Venezuela.

Fidel Castro tabata e figura central den surgimento di dictadura Chavista, cu a introduci e sistema Comunista, cu a nacionalisa cantidad di industria productivo y sigur den e sector petrolero.

Prueba di esaki ta e cantidad di companianan internacional, manera di Merca, cu mester a bandona Venezuela den e nacionalisacion di petroleo y a hiba perdidanan enorme. Te ainda un cantidad di e companianan aki ta busca nan pago, entre otro den casonan den Corte na paisnan manera Merca, caminda nan ta pidi pa bende Citgo pa nan haya e place cu Venezuela debe.

Cubanonan, entrena na nan turno dor di Rusia tabata e forsa grandi di Hugo Chavez, cu a tene duro na Fidel Castro te su morto.

Ta Cuba a militarisa Venezuela, cu tin ekipo militar Ruso manera informacionnan continuo tabata mustra region di Caribe, cu a perde atencion di e realidad na Venezuela, debi na e pandemia di Covid-19.

Na mes momento Husticia Mericano a inicia cantidad di caso criminal, no politico, manera pa labamento di placa y hasta droga, contra e grupo directo di Maduro cu ta te awe fugitivo di Merca.

E combersacionnan entre e representante di Biden y Maduro no a conduci na nada concreto cu no ta libertad di solamente dos di e total di seis miembro di gerencia di Citgo, cu a wordo encarcela y di cual uno, Nelson Martinez, a muri den prison.

Informantenan clave a mustra cu Aruba y region di Caribe y Latino Americano no mester relaha enfrente cantidad di informacion sin base y hasta falso cu ta circula entorno e bishita di e representante di Biden na Venezuela.

Por cierto na Merca mes, Biden tin suficiente oposicion contra un relacion cu Venezuela, mientras mundo ta wordo ciega cu un exigencia pa Maduro bay sinta na mesa cu Juan Guaido despues cu henter Latino America liber tabata parti di un operacion pa baha Nicolas Maduro.

E informacionnan di DIARIO ta sigui mustra riba Chevron, cu ta e ultimo compania petrolero Mericano na Venezuela, cu a hiba perdida grandi na e pais. Chevron a haya permiso di Merca pa keda Venezuela pero e permiso aki por wordo alarga.

DIARIO a splica Aruba cu Chevron ta mantene cabez di Venezuela riba awa riba tereno economico.

Pa Nicolas Maduro ta sumamente dificil, pa no bisa imposibel, pa sin mas bay contra Rusia y Cuba y yega na un relacion nobo cu Merca den un guera internacional.

Dictador Nicolas Maduro, ta depende di avionnan, ekipo, barconan militar di Rusia y Cuba pa e keda na mando y dirigi e pais cu militarnan Cubano cu ta uza e base comunista pa dirigi e ehercito.

Aruba y e otro islanan Hulandes mester cuida nan costa den e situacion sumamente peligroso segun informantenan clave di DIARIO, cu ta mustra cu awe e peliger Venezuela pa mas grandi cu nunca, pasobra un aparencia falso a wordo crea.

DIARIO ONLINE

Por admin

Deja una respuesta

Tu dirección de correo electrónico no será publicada. Los campos obligatorios están marcados con *