“Si awe Aruba kier celebra Status Aparte como realidad di un Pueblo autonomo, mester tene duro na e forsa di Florin Arubano, cu ta e unico garantia di autonomia real di Aruba.”

Palabranan di expertonan, cu DIARIO a acerca mientras Aruba ta prepara pa celebra Dia di Himno y Bandera na un momento crucial den su historia.

“Ora papia di Status Aparte no ta papia di separacion di Aruba for di Antia Huilandes sin mas. Ta papia aki di creacion di un nacion autonomo, un pais berdadero cu e lazo di Statuut cu Reino, pero capaz pa percura pa e bienestar di e Pueblo sin dependencia na otro pais.”

Advertisement

Cu Betico Croes tabata tin e realidad aki su dilanti ora e tabata enfrenta Hulanda pa logra e anhelo di Aruba, ta hancra den e hecho cu Betico Croes a presenta un Aruba cu un propio base financiero, basa riba su propio Banco Central y su propio moneda.

Na un momento sumamente critico pa mundo, e vision di Betico Croes a haci cu Aruba ta e unico pais Hulandes den Caribe y hasta den Reino, cu por atende cu su situacion financiero na un forma completamente independiente.

Expertonan a indica, cu a bira tempo pa e realidad aki bini dilanti y hasta wordo splica na muchanan y hobennan cu mester comprende kico esaki ta nifica.

Despues cu Aruba a logra su Status Aparte na e Conferencia di Mesa Rondo na 1983, por mira con Antia Hulandes a subi e caminda pa final di e constelacion Antiano.

Curacao y Sint Maarten tambe a scoge pa Status Aparte mientras a introduci e concepto di “Islanan BES”pa e islanan mas chikito di Reino Hulandes den Caribe.

Sinembargo, e Statut Aparte di Curacao y Sint Maarten ta diferente den e realidad cu e dos paisnan a opta pa un solo Banco Central y pa un solo moneda.

E Florin Antiano cu tabata moneda di Antia Hulandes, a wordo mantene pa Curacao y Sint Maarten hunto.

Hulanda di su parti como Miembro di Union Europeo, ta mantene su mes na Euro, cu e exigencianan y realidad di Euro.

Esaki ta nifica cu Aruba ta e unico pais liber riba tereno monetario cu su propio Florin y su propio Banco Central, cu ta encarga cu e Florin.

Esaki ta duna Gobierno di Aruba un responsabilidad mucho mas grandi den su maneho diario, di cual Florin ta depende.

Un situacion di debe grandi di pais Aruba, directamente ta menasa e Florin di Aruba. Mal maneho di un Gobierno, cu ta crea dependencia di asistencia financiero di e pais, ta deshaci di e autonomia real di e pais.

Expertonan a mustra DIARIO riba e realidad di Surinam, cu a haya su independencia dia 25 di November 1975, pero a pesar di su rikeza natural enorme, no a prepara su mes bon pa su futuro independiente.

Resultado tabata cu despues di su independencia Surinam a sigui depende di sumanan grandi cu Hulanda a duna como asistencia pero cu no a habri caminda pa Surinam pasobra e uzo cu e inversionnan a haya no tabata den cuadro di inversionnan cu realmente por a crea un base economico.

Betico Croes a negocia un Status Aparte cu un Florin Arubano, pa cual solamente Aruba tabata responsabel y cu mester tabata asina fuerte cu e por a sostene un pais completamente independiente.

“Pa un pais por hiba un maneho cu ta conduci na felicidad di e Pueblo, na democracia real, como pais e mester ta manehador di su placa, di su moneda. Den Antia Hulandes Aruba tabata produci placa pero e maneho financiero, economico y monetario no tabata di Aruba so,” expertonan a splica.

Betico Croes a presenta un Status Aparte cu un Florin fuerte, cu salida di Lago a kibra. Sinembargo, e economia cu e ultimo Gobierno Insular di Aruba a hiba, a percura pa Aruba tabata tin e pilar di turismo mientras a introduci medida pa e situacion financiero di Aruba.

Awe Gobierno Wever-Croes mester carga Aruba pa un destino nobo den un situacion mundial cu a wordo afecta dor di crisis di petroleo, Covid-19 y awor un Guera Mundial.

E hecho cu Florin di Aruba ta independiente di otro monedanan den Reino ta habri caminda pa Gobierno di Aruba lucha pa e bienestar di Aruba.

Banco Central di Aruba ta dirigi e moneda sin necesidad di tene interes di otro pais su dilanti pa asina e bienestar di Aruba por ta sigura.

“Un Florin fuerte no ta permiti fiesta tur dia pero ta exigi responsabilidad grandi di Gobierno di Aruba, cu a ricibi di Betico Croes e arma mas grandi di un pais autonomo,” expertonan a splica.

DIARIO ONLINE

Por admin

Deja una respuesta

Tu dirección de correo electrónico no será publicada. Los campos obligatorios están marcados con *