E posicion y posibilidadnan pa Aruba den e panorama mundial nobo, crea pa e guera na Ukraine, tin e atencion total di DIARIO, cu den contacto cu su informantenan den exterior a wordo mustra riba e desaroyonan sumamente importante pa Aruba pa loke ta trata negoshi den gas.

Manera lectornan di DIARIO mes por a aprecia, for di momento cu e proyecto Eagle LNG a wordo presenta na Aruba, DIARIO no a tene su mes solamente ocupa cu entrega di gas pa WEB.

DIARIO a mustra for di inicio di 2021, con adaptacion di por ehempel WEB na gas, ta habri un porta pa sigui adapta e compania na energia limpi manera hydrogen.

Advertisement

Esaki debi na e hecho cu e instalacionnan di WEB pa atende cu gas na lugar di azeta, por wordo uza pa hydrogen tambe manera proyectonan cu ta wordo realisa dor di Gasunie na Hulanda, ta demostra claramente.

E realidad aki ta haci cu e infrastructura, e base cu mester pa por pasa di gas pa hydrogen, ta mas facil.

Pa DIARIO e totalidad di e proyecto di gas tabata importante debi na cambionan comercial mundial, den cual riba nivel internacional ta adapta na e exigencianan di energia mas limpi pa sostene e accionnan contra peliger di cambio di clima.

Den e situacion mundial nobo por mira claramente con salida di petroleo y gas a wordo afecta directamente dor di Crisis di Ukraine, caminda Rusia como productor di petroleo, ta origen di e Guera na Ukraine.

Den e situacion di Guera na Ukraine, por nota cu manera DIARIO a anuncia, comercio internacional ta clave y den esaki sigur e negoshi di petroleo y gas cu tabata tin un schedule pa futuro debi na clima.

Desaroyonan ayera ta mustra cu Putin dirigente di Rusia, cu un moneda cu no bal nada, ta trata di haya sosten nobo pa manda su Roebel halto. E no kier pago pa su entrega di petroleo cu Dollar ni Euro pero cu Roebel, cu no tin balor compara cu e Dollar y Euro.

Prijs di petroleo ta sigui subi y baha manera ola di lama y ta keda halto, mientras na Venezuela awor abiertamente Chevron ta pidi Merca pa deshaci di medida contra Venezuela y Nicolas Maduro tin su bista dirigi riba Guyana loke por resulta den mas conflicto cu e tin.

Mientras paisnan manera Canada tambe kier ofrece nan petroleo, gas ta conoce su momento mas importante y e papel di Eagle LNG den comercio internacional ta mas pronuncia.

Informantenan di DIARIO a confirma e interes di DIARIO pa e resto di pakete di Eagle LNG na Aruba, cu ta los for di WEB.

Importante ta, cu mescos cu otro companianan prestigioso den e negoshi mundial di gas, Eagle LNG ta traha riba un producto cu menos peliger pa clima. E “purificacion” di gas di ingredientenan cu ta afecta clima ta uni na yega na gas cu por uza y sigui uza (renewable gas), mientras companianan di barco cu ta transporta gas, ta pura pa haci nan negoshi.

Aki ta yega pues na e factor mas importante pa economia di Aruba, ademas di e realidad cu prijs di awa ta baha, cu ta e posibilidadnan cu ta wordo crea pa trafico maritimo cu mas y mas ta uza gas como nan combustibel.

Bunker na Aruba pues ta duna contenido nobo na servicionan maritimo na Aruba, caminda tambe lo habri e negoshi pa destribui gas cu e region.

Un aspecto importante ta tambe, cu boznan a lanta pa suspende e momento cu ta stop di inverti y crea mas negoshi pa gas, wordo cambia pa paisnan chikito y bira mas laat cu e fecha cu ta stipula actualmente na cual paisnan grandi lo mester mantene nan mes.

DIARIO ta vigila interes di Aruba den e situacion mundial den un cuadro amplio pa asina e lector Arubano ta bon informa di loke e por spera y yuda Aruba enfrenta e momentonan mundial dicifil cu a presenta na forma inespera.

E careda di companianan grandi pa confirma nan negoshinan di gas na e momento aki, ta sostene e importancia di Eagle na Aruba.

DIARIO ONLINE

Por admin

Deja una respuesta

Tu dirección de correo electrónico no será publicada. Los campos obligatorios están marcados con *