Tabata Diaranson siman pasa cu Guardacosta di Caribe Hulandes a ricibi un mensahe di S.O.S. procedente di e tankero ‘MV Cetus’ cu e momento ey tabata nabegando na como 210 kilometer Noordoost di Aruba.
E mensahe di S.O.S. ricibi riba Emergency Satellite Beacon ta mustra cu e tankero cu 16 tripulante ta den peligro, y cu e tripulantenan ta bandonando e barco.
E tankero Cetus ta uno special pa transporta productonan di crudo y petroleo, fabrica na 1982 y atravez di añanan a wordo opera pa diferente instancia y compania, cuminzando cu Gobierno Cubano na 1982 y e tempo ey e barco tabata yama ‘Rene Martinez Tamayo’. El a cambia di nomber 7 biaha, y awor e ta nabegando cu su nomber #8, cu ta ‘MV Cetus’ y nabegando bao bandera di e archipelago di Comoros, na costa banda pariba di Africa. E barco ta 90 meter largo, y 14 meter hancho.
Como cu Guardacosta di Caribe Hulandes ta e instancia mas cerca di e emergency beacon aki, mesora Rescue and Coordination Center (RCC) a saca e avion Dash-8 di Guardacosta pa bula den e area pa tuma nota.
Ora cu e avion yega den e area, nan a nota cu ya e barco a sink, y cu tin tripulantenan ta drief riba diferente ‘fenders’, cu ta e tipo di cusinchi grandi cu barconan ta pone na banda pa evita cu e barco ta raspa na muraya di waf of na otro barconan.
E avion a bula mas abao, y a benta dos Boto Salbabida di Rubber, como cu e dosnan aki ta suficiente pa 16 naufrago y un cacho.
Pilotonan den e Dash-8 a mira con e naufragonan a landa y bay rapidamente den e dos botonan salbabida, sperando riba yudanza cu lo ta na caminda. Pa por keda mantene tur dos boto na bista, RCC a manda un otro avion di patruyahe na e lugar, pa asina duna asistencia.
E Helicopter di un Cutter di US Coast Guard, esta Thetis, tambe a duna un man durante e accion di rescate aki.
Mientras tanto, RCC a logra di manda un peticion na e tankeronan Melba y tambe tankero Stavanger via e sistema di texto NAVTEXT, pa duna un man den e caso aki. Ambos a bay di acuerdo pa desvia di nan ruta pa bay rescata e naufragonan.
Cada tankero a yuda e naufragonan di un boto salbabida. Den coordinacion cu RCC, y e capitannan di e dos tankeronan, e naufragonan y un cacho a wordo transporta. Un tankero a bay Venezuela, y uno a bay Trinidad & Tobago.
For di combersacion cu e naufragonan, a bin realiza cu a piki un total di 14 naufrago. Esey nifica cu nan ta sinti falta di 2 persona di e barco MV Cetus.
Mientras tanto, e tankero cu a yega Venezuela a trece sano y salvo 9 naufrago. Tres di nan ta Venezolano, 5 ta Dominicano, y 1 ta Cubano.
E avionnan di Guardacosta di Caribe Hulandes a keda bula un tiki den e area pa check si por haya e 2 persona perdi, pero esey no tabata exitoso. Kizas nan lo a sink den e barco bay abao cune.
No ta conoci si acaso e barco tabatin crudo of cualkier producto deriva di petroleo abordo. E informe ricibi di Guardacosta di Caribe Hulandes no ta menciona nada si acaso a detecta un mancha di azeta riba lama den e area ey.
DIARIO ONLINE
¡Participe en las actividades de tenis de playa en Aruba!...
Tauro's Esthetic Center. Santa Helena Straat #D, Oranjestad, Aruba. +297 583 7280
Desenmascaran la trama de desfalco, corrupción e impunidad que involucra en Venezuela a Raúl Gorrín y Gustavo Perdomo, cómplices de la extesorera nacional Claudia Diaz Guillén
Los problemas de César Omaña con la justicia de Estados Unidos y de otro también aliado del opositor venezolano Leopoldo López
