E ta un pida cu den kilometer e ta relativamente chikito. Pero e lama mey-mey di Venezuela y Aruba den pasado a yega di demostra cu e ta hopi traicionero. Bo ta hayabo mey-mey riba e ruta tin biaha cu un coriente di lama masha fuerte mes, unda hasta cu un outboard engine chikito ta dificil pa mantene ruta corecto ora ta moviendo direccion Aruba.

Pero toch tin hopi Venezolano cu ta busca cueste loke cueste un chens di cruza lama pa bin busca un mihor porvenir na Aruba. Otronan ta djis trata di drenta bek, despues cu nan a wordo deporta caba.

Mayoria vez, e botonan aki ta trata di drenta den areanan ‘scondi’ anochi, manera pariba di Baby Beach cu ta cerca di Santana di Cacho, of na Grapefield, Savaneta, of tambe na Pos Chikito.

Advertisement

Pero ta parce cu Diabierna madruga pa mainta, un di e botonan aki a dicidi na nabega directamente pa Oranjestad, y ta parce cu e biaha aki como 75% di esnan abordo a logra subi tera sin wordo detecta. Entre nan e capitan cu a dicidi bandona e boto, y busca escondite riba e isla.

Tabata Diabierna pa 7:35’or di mainta, cu Central di Polis ta worde notifica door di Havenkantoor di Aruba Ports Authority, cu e momento ey nan ta mirando un boto di piscado bashi ta drief na altura di boca di Waf di Paardenbaai banda pariba. Tabatin indicacion cu riba e Rif tambe lo tin mas hende.
Mesora unidadnan di Polis di Playa a worde despacha pa e lugar, y na mesun momento a pone Polis Maritimo na altura, y a yama Guardacosta di Caribe Hulandes pa notifica nan. Oficialnan di Guarda Nos Costa tambe a yega pa rapidamente duna un man valioso.

Guardacosta di Caribe Hulandes a laga nan Helicopter subi pa asina duna un man valioso. Aki mester a coordina cu Toren di Control, como cu e espacio di buskeda ta net den e area unda avionnan cu ta aterizando ta den ‘final approach’.

E biaha aki ta parce cu e boto aki no a wordo detecta door di marine-radar.

E prome unidadnan di Polis a bay pa e area di Surfside, net pabao di pista di Aeropuerto. Asina na altura di Nikky Beach, agentenan a logra detene dos persona indocumenta.
Un di esnan deteni, durante di interogacion a bisa Polisnan cu aparentemente nan lo tabata 8 persona total riba e boto.
Polis Maritimo a yega rapido y asina a yuda den e buskeda pa e otro ilegalnan cu lo por ta scondi riba rif, of mey-mey di e mangelnan cerca di costa.

DIARIO ONLINE

Por admin

Deja una respuesta

Tu dirección de correo electrónico no será publicada. Los campos obligatorios están marcados con *