Un situacion di incertidumbre grandi ta loke mundo ta conoce mientras e guera na Ukraine ta dicidi pa un economia mundial, manera DIARIO for di prome momento di e crisis a adverti.

Den contacto continuo cu informantenan local y internacional, DIARIO a wordo informa ayera prome cu a cera e edicion di awe, cu ta dificil pa pronostica sigur kico petroleo como indicador financiero y monetario di mundo, lo haci den e proximo dianan.

Despues di a conoce aumento a base di e desaroyonan na Ukraine, ayera cu excepcion di e prijs di paisnan di OPEC, prijs di petroleo a cuminsa baha ora a bira conoci cu realidad lo stroba paisnan di Europa y otro partinan di mundo, pa deshaci completamente di nan negoshi den petroleo cu Rusia cu ta productor di azeta.

Advertisement

Mientras mundo a haci su mes dependiente di petroleo, el a mara su mes tambe na condicionnan cu ta surgi den comercio internacional cu mundo a cambia a base di e relacionnan entre paisnan sigur despues cu guera friu a pasa pa pasado.

For di prome momento cu e crisis a haya su inicio, DIARIO a papia di e dependencia di Merca y Europa di petroleo y gas Ruso, cu awor nan no por scrap pasobra ainda nan no ta capaz pa haya otro fuente di combustibel.

Instabilidad economico y financiero di e forma aki ta destaca y a wordo confirma ayera tambe dor di e Secretario di Transportacion di Merca, Pete Buttigieg , cu a mustra riba e problemanan serio cu e guera na Ukraina a produci pa comercio internacional.

E gobernante Mericano, kende tambe tabata un candidato presencial den e ultimo eleccion na Merca, a mustra cu mester sigui vigila e informacionnan di fechanan di entrega pa e proximo lunanan.

Pa Europa e situacion actual sigur tin resultado. Informantenan na Hulanda a indica na final di e dia di ayera na DIARIO, cu e situacion ta serio ya cu e sancionnan contra Rusia por nifica cu Miyones di bari di petroleo menos lo por alcansa paisnan cu ta depende di entrega di petroleo dor di Rusia.

“E situacion mundial ta bira cada rato mas confuso. Ukraine a mustra cu pa gobierno firma un acuerdo cu Rusia, mester di aprobacion di Pueblo. Tur pais ta trata di papia cu otro mientras Nacionnan Uni a duna prueba di no por atende cu un conflicto internacional.”

Informantenan experto di DIARIO na nivel local y internacional cu ta di opinion cu Aruba actualmente mester percura pa maximo vigilancia monetario, financiero y economico.

Un aspecto cu ayera a aumenta e totalidad di problema cu por spera na 2022 y hasta na 2023 ta e hecho cu productornan di machinenan cu ta necesario pa produci chip a duna di conoce, cu nan no ta capaz pa atende cu e demanda na 2022 y probablemente tampoco na 2023.

Teniendo na cuenta cu mundo ta depende di chip pa su produccion basico, e informacion aki solamente a pone mas peso den un situacion internacional, cu a wordo marca ayera pa e aumento di prijs di petroleo.

Inflacion a sigui aumenta y cu inflacion problemanan serio pa cantidad di empresanan rond mundo cu ta mira cu nan benta a cay of ta wordo menasa cu caida di e forsa di compra di clientenan.

Uno di e companianan aki sigur ta e gigante Evergrande Group di China, cu manera DIARIO a splica for di fin di 2021, ta den problemanan financiero sumamente serio y por impacta comercio y economia mundial.

Ta trata aki di uno di e empresanan mundial mas poderoso cu for di 2021 a duna muestra cu e no por paga su debe di 2.1 Biyon loke por tin resultado serio pa economia mundial.

Informantenan no kier a papia ainda di un recesion cu lo ta realidad si Evergrande tambe bini abou, pero si ta papia di un situacion mundial economico peligroso.

Informantenan ta sigui adverti cu na Aruba, ciudadanonan mester tene na consideracion cu mundo ta pasa den un crisis, cu ta afecta bida di tur hende.

Organisacionnan local mester duna bon informacion na nan miembro y tur sector mester prepara nan mes pa situacionnan dificil cu lo ta resultado di e situacion actual hasta si den 24 hora un milagro socede y yega na un compromiso pa pone fin na e menasanan mas serio.

DIARIO ONLINE

Por admin

Deja una respuesta

Tu dirección de correo electrónico no será publicada. Los campos obligatorios están marcados con *