Diabierna atardi, oficialmente Ministerio Publico a duna un relato na prensa, pa indica cu e investigadornan di Polis, y Ministerio Publico a cera investigacion di caida mortal for di e parkinglot di multi piso na Paseo Herencia Mall.

Tabata dia 17 October 2021, Polis a haya un melding di un persona cu a cay desde parkinglot di Paseo Herencia na Palm Beach.

E hoben Luis Angel Figueroa Flores di 20 aña a resulta mortalmente herida. Recherche a cera e investigacion di e caida aki. Ministerio Publico a tuma e decision pa no duna ordo pa mas investigacion y a cera e dossier.

Advertisement

Famia di e fayecido conoci como DJ Louisville, a worde poni na haltura di e decision aki den un combersacion personal.

Conclusion di Investigacion: E conclusion despues di e investigacion ta, cu ta trata aki di un accidente unilateral hopi lamentable. No tin ningun indicacion cu lo tin otro persona of personanan envolvi.

Investigacion di pistanan na e lugar y investigacion di e smartphone di e fayecido no ta duna ningun indicacion cu un crimen lo por a tuma lugar.

Detayenan di e investigacion aki a worde papia cu e famia. Ministerio Publico ta di opinion cu considerando privacidad di e fayecido, no ta na su lugar pa bisa mas tocante e detayenan aki.

Un hoben sin problema: Aki DIARIO tin di agrega, cu Famianan na numeroso ocasion a yega di mustra cu Luis Angel ta un hoben trankilo cu no ta busca problema! Tabatin algun comentario na October cu a pasa, cu e hoben kizas a bay na e piso halto di e Parkinglot pa saca un ‘Selfie’ cu kizas The Cove Mall como ‘background’ di su Selfie, y kizas pesey a perde balanza y cay.

Hecho ta cu Recherche a cana tras di tur pista. A interoga tur hende, incluyendo un persona kende riba social media a gaña cu e tabata riba parkinglot y a mira supuesto bringamento. Dilanti Recherche e persona aki a bin bisa cu el a djis gaña y no a mira nada. El a bisa cosnan ey riba Social Media djis pa e ta “in” den e storia.

Algo cu DIARIO ta lamenta un tiki, ta cu nunca a ofrece un “Recompensa” fuerte pa cualkier persona cu tin Tip pa duna esaki. Esey a socede nunca. Pero kizas debi na e hecho cu ningun indicacion ta mustra di ta un crimen, pesey kizas di hopi tempo caba Recherche a nota y keda convenci cu ta djis un ‘accidente unilateral’ (“eenzijdig”) a socede aki.

DIARIO ONLINE

Por admin

Deja una respuesta

Tu dirección de correo electrónico no será publicada. Los campos obligatorios están marcados con *