“Esaki por wordo yama periodismo? Esaki ta trabou di periodismo cu mester ta instrumento sagrado di democracia?”

Ta cu asco por contempla imagennan den cual Prome Ministro Evelyn Wever-Croes ta wordo ataca cu e lodo mas barata, mas sushi, cu loke ta yama su mes periodismo, a yega di produci.

Ora mira imagennan cu ta wordo presenta dor di 24ora.com, cu a cay den nos man, nos stoma no por a soporta cuminda.

Advertisement

Cara di Prome Ministro a wordo uza pa crea imagennan pornografico cu a wordo lansa den publicidad dor di 24ora.com.

Asco, pero asco profundo a yena nos ora nos a tuma nota di loke ta yama su mes periodismo, prensa, na Aruba.

Cu na Aruba cierto grupo politico ta capaz di tur cos, ta algo cu no ta ningun novedad. Cu na Aruba tin un grupo cu miedo di perde nan poder, no ta un noticia pa nos.

Pero cu loke kier yama su mes prensa, medio di comunicacion, periodista, por baha te mas abou cu suela, a laga nos den shock.

Si mira imagennan cu como parti di prensa Arubano a wordo presenta na mundo, holor di cadaver cu a keda basta rato den solo, ta yena nanishi.

Cara di Prome Ministro Wever-Croes ta wordo uza den caricatura pornografico y baho cu hamas por wordo considera ilustrativo pa loke ta prensa Arubano.

Abuso a wordo haci di un politico, cu a haci loke ningun hende (ni nos mes a spera), cu ta di evita cu Aruba a zink den e situacion cu el a hereda Aruba.

Esaki ta e problema di Prome Ministro Wever-Croes, cu a sorprende Aruba, a sorprende Reino y a sorprende mundo pa e trabou cu el a haci.

Na 2018, ora un situacion dramatico na Aruba a nifica inicio di e columna Analisis, nos no por a pensa cu Aruba lo a scapa, manera a socede.

Ta tristo cu awe, riba internet 24,.com ta bisa cu e mester uza sushedad pa informa Aruba y ta presenta pornografia pa destrui Prome Ministro Evelyn Wever-Croes. Cara di un persona cu ta practica sex, a wordo reemplasa cu cara di Prome Ministro Wever-Croes, kende su cara tambe ta wordo poni na dibujo di sex.

Cu ta bay bati na porta di Gobernador y ta bay Sociedad Internacional di Prensa pa bisa cu Prome Ministro Wever-Croes no ta atende cu un medio di comunicacion despues di e publicacionnan aki, ta un berguensa nacional pa Aruba, pais di dignidad, di honor, di mentalidad limpi.

Sociedad Internacional di Prensa ta considera loke a haci cu Prome Ministro Wever-Croes trabou di prensa? Sociedad Internacional di Prensa ta di acuerdo cu a uza cara di un Prome Ministro pa fantasia pornografia? Sociedad Internacional di Prensa ta considera e produccion sushi, askeroso, di 24ora periodismo?

Sociedad Internacional di Prensa ta kere den democracia? Si ta asina, con e ta pone Aruba na nivel di Venezuela pasobra 24ora.com ta abusa di un Prome Ministro?

Awe berguensa ta cubri periodismo. Lodo ta wordo uza den wega politico di mas baho, sushi, dor di mannan scondi, dispuesto na destrui basta nan tin poder.

DIARIO ONLINE

Por admin

Deja una respuesta

Tu dirección de correo electrónico no será publicada. Los campos obligatorios están marcados con *