Durante e reunion publico den Parlamento diaranson mainta pa trata e tematica di frontera cu Venezuela, Prome Minister Evelyn Wever-Croes a duna un splicacion di e maneho di e comision cu ta encarga cu e tema aki. Mirando cu e crisis na Venezuela ta escala na nivel di crisis, a instala e comision cu tin e tarea tambe pa conseha Gobierno riba esaki.

Prome Minsiter a indica cu comision a duna Gobierno e conseho pa mantene e frontera cera principalemente pasobra ainda ta na mesa di deliberacion y tambe pa motibo di e riesgonan cu tin. Gobierno ta haci esaki a traves di un Landsbesluit cu ta saca cada tres luna of menos. E ultimo conseho tabata pa prolonga ciera pa tres luna te na fin di aña. Pero si keda cla cu palabracionnan prome, por haci cambio y habri frontera.

COMISION:

Advertisement

E comision ta consisti di diferente stakeholder y ta consulta cu diferente stakeholder. E ta wordo dirigi door di Bureau Rampenbestrijding Aruba (BRA), y ta hiba combersacionnan cu Directie Buitenlandse Betrekkingen (DBB), Veiligheidsdienst Aruba (VDA), Cuerpo Policial, Dimas, DVG, Directie Sociale Zaken, DOW, Directie Luchtvaart, Directie Scheepvaart, ATA, Inmigracion Aruba, Havenmeester di Aruba, Kustwacht di Aruba y representante di Ministerio di Husticia encarga cu grensversterking den cuadro di e landspakket, Directie Economische Zaken y un representante di Ministerio di Economische Zaken pa atende cu e aspectonan economico di esaki.

CUATRO DIFERENTE TIPO DI RE-APERTURA:

Riba peticion di Gobierno, e comision ta trahando, no ta di awo, riba e tema aki cu ta wordo distingui den cuatro diferente tipo di re-apertura. E prome dosnan tin di haber cu trafico maritimo y e otro dosnan tin di haber cu trafico aereo.

Pa loke ta trafico maritimo, e prome cu ta pensando riba dje ta habri e ruta di e waf di Venezuela pa Aruba pa asina por transporta fruta, berdura y cierto materialnan. Despues un siguiente stap lo ta pa habri pa yatenan priva, cu aworaki no ta posibel.

Pa e parti aereo, ta pensa pa habri aeropuerto principal Reina Beatrix cu vuelonan Aruba-Venezuela y Venezuela-Aruba. Y e otro parti cu lo bin despues ta pa habri pa jetnan priva tambe.

Na e momentonan aki, ta trahando riba e parti maritimo. Gobierno a pone riba papel un lista di condicionnan cu palabracionnan concreto. Entre otro condicion, ta e documentonan cu un capitan di un barco mester tin den su man prome cu e sali for di waf di Falcon y prome cu e drenta Aruba. “Esaki ya caba ta algo cu a traha bon, y ta loke nos kier e biaha aki tambe”, Prome Minister a duna di conoce.

STAKEHOLDER:

Diferente stakeholder, entre otro Cuerpo Policial y Inmigracion ta identifica e riesgonan (knelpunten) cu re-apertura di frontera. Dimas tambe a indica cu su preocupacion principal na momento cu habri frontera, ta e tema di asilo. E tema aki ta un tema hopi delicado pasobra ta trata di personanan y sufrimento di personanan. Tambe ta preocupa cu bishitanan di famia cu lo drenta, anto hopi biaha nan no ta bay bek. Esey ta e tendencia cu a mira den pasado cu ta wordo yama ‘overstayers’. Hendenan ta keda Aruba y nan ta drenta e circuito ilegal cu ta un problema pa Aruba.

“Mi tin tur confiansa cu si ambos parti demostra e disponibilidad pa yega na palabracionnan, nos lo por sali afor. Nos ta convivi cu e situacion na Venezuela cu ta haci nos dolor pasobra hopi di nos tin familiar cu a bin di Venezuela. Nos tin laso cultural y economico. Venezuela ta hopi mas cerca cu otro paisnan. Pero nos no por soluciona e problema di Venezuela. Nos ta luchando pa resolve nos propio problemanan, pero e problema di Venezuela y den Venezuela ta nan mester solucion’e.

Mientrastanto nos mester percura pa Aruba recupera y ta fuerte, pa nos ta para riba nos pia y yuda tur cu ta biba akinan. Sea bo a nace aki of no, e ta nos responsabilidad pa yuda tur akinan. Drecha calidad di bida di nos hendenan, crea mas cupo di empleo pa nan tambe, percura pa tin educacion riba nivel pa tur nos muchanan. Y ora nos ta para fuerte riba nos pia, nos por yuda otro pais mas miho”, Prome Minister a expresa.

Premier y tambe Ministro di Husticia a informa Parlamento riba e asunto di frontera cu Venezuela

Diaranson mainta, durante reunion publico den Parlamento, Prome Minister Evelyn Wever-Croes y Minister di Husticia, señor Rocco Tjon, a duna splicacion amplio riba e tematica di frontera cu Venezuela.

Prome Minister a enfatisa cu esaki ta un tema dificil y delicado y a remarca cu Gobierno di Aruba ta na mesa cu autoridadnan di Venezuela pa yega na bon palabracion riba un apertura di e frontera sigur y responsabel.

Prome Minister a splica di con e frontera ta cera na prome luga y kico Gobierno ta haciendo pa yega na un re-apertura di un frontera na un manera responsabel. Gobierno ta presente den Parlamento pa motibo cu tin cierto bruhamento di tera ta tuma luga riba e area aki y ta necesario pa trece claridad.

“Mi kier a haci un apelacion serio riba Parlamento specialmente oposicion y señor Mansur cu no tabata presente den e reunion, e tema aki ta uno hopi delicado y no ta un tema cu ta presta su mes pa ningun tipo di speculacion ni bruhamento di tera”, Prome Minister a enfatisa.

Riba e peticionnan: Prome Minister a remarca cu Gobierno ta worde acerca pa dos tipo di peticion. E prome ta esnan cu ta pidi pa habri frontera pa nan por bishita nan famianan na Venezuela.

Aworakinan e frontera ta cera pero por yega via Panama, Colombia y Santo Domingo pero e rutanan pa hopi ta mucho costoso. E otro peticion ta bin di parti di comercio, pa asina nan por importa productonan y materialnan mas barata pa nan por bende akinan. Un di tres peticion cu ta bin acerca ta e aspecto diplomatico cu Aruba no ta den guera cu Venezuela pues no por keda cu e frontera cera sin limite.

A cera na Januari 2018: Frontera cu Venezuela ta cera desde Januari 2018 despues cu Presidente Nicolas Maduro unilateralmente a cera frontera cu Aruba, Curaçao y cu Bonaire y a acusa nos di ta horta tur nan koper. Ora cu a bay haci investigacion a bin descubri cu berdad koper ta worde saca di Venezuela, e ta pasa Aruba pero no ta keda Aruba sino ta bay otro paisnan.

Aduana di Aruba a haci investigacion y yega na conclusion cu tur doorvoer cu tabata tin di koper a pasa cu e documentonan oficial di autoridadnan Venezolano. Riba esaki Venezuela a indica cu e documentonan por tabata falsifica.

Asina Gobierno di Aruba a sinta na mesa cu autoridadnan di Venezuela pa siña conoce ta kico e formularionan y e stempelnan official di Venezuela ta. E negociacionnan ey a sigui te mediano di aña na 2018 ora cu a yega na palabracionnan hopi bon entre autoridadnan maritimo di Aruba y Venezuela. A habri fronteranan back y tabata tin un comunicacion hopi estrecho entre e haven meester di Aruba y haven meester di Venezuela. Acuerdonan a worde stipula entre otro un boto por sali solamente di estado Falcon pa bin Aruba cu a facilita trabao di haven meester di Aruba cu tabata sa adelanta ken ta bin y kico nan ta bin cu ne.

Atrobe na Januari 2019: Na Januari 2019 Presdidente Maduro a bolbe dal e frontera cera cu Aruba, Bonaire y Curaçao. E biaha aki pasobra Curaçao a bira manera un hub humanitario pa ayudo den Venezuela y e Presidente no a gusta e maneho ey y a cera e frontera.

E tempo ey nos comercio a caba di recupera di e ciere na comienso di aña 2018, comercio a dicidi cu no lo warda mas pa e situacion politico na Venezuela cambia y nan a cuminsa busca otro rutanan alternativo.

Mei di 2019: Riba un diabierna mainta na Mei di 2019 mientras fronteranan ta cera ainda, Gobierno di Aruba a haya notificacion cu Venezuela a dicidi cu e ta habri frontera back. Unilateralmente y sin consulta, nan a habri e frontera back cu Aruba y tabata tin avionnan en ruta pa Aruba.

momento ey Aruba tabata tin riba 2000 peticion pendiente pa asilo politico di personanan di decendencia Venezolano y a dicidi di cera e frontera pasobra Aruba nos no tabata cla pa habri’e back. E situacion te cu awe ta cu e frontera entre Aruba y Venezuela ta cera for di Aruba y e frontera entre Curaçao y Bonaire ta cera door di Venezuela.

Gobierno di Aruba, na Mei 2019 a extende un invitacion na autoridadnan Venezolano pa bay back mesa y papia riba e condicionnan pa re-apertura di e frontera. Pero ta te na 2020 a logra haya nan pa bin na mesa. Sinembargo covid a dal y tur cos a para back.

Prome Minister a duna di conoce cu na e momentonan aki, e posicion di Aruba ta sigui igual. Pa habri e frontera mester yega na palabracionnan concreto cu autoridadnan Venezolano. Mester yega na acuerdo riba e condicionnan pa evita problemanan manera a encontra na 2018 y 2019. Pues e posicion di Aruba ta papia prome, yega na palabracion y despues lo anuncia re-apertura. Venezuela ta prefera anuncia prome.

“Ultimo lunanan autoridadnan Venezolano a mustra mas interes. Mi a papia cu e canciyer di Venezuela na Honduras y el a expresa interes pa habri frontera y mi a bise cu sigur ta posibel pero mester sinta na mesa y papia di condicionnan. E combersacionnan ta biniendo poco poco riba pia y mi ta spera cu nos por tin bon palabracionnan pa Aruba ta sigur cu harbrimento di frontera ta safe y sigur y responsabel.

Reapertura di frontera cu Venezuela mester bay den fase

Diaranson mainta, Minister di Husticia and Asuntonan Social hunto cu colega Minister President Señora Evelyn Wever-Croes asiste a una reunión pública del Parlamento di Aruba, pa asina trata e tematica di reapertura di fronteriza cu Venezuela.

Minister Tjon a indica cu Gobierno di Aruba tin e deber ye responsabilidad di mira e situacion di cada angulo y tene diferente aspecto den consideracion. Entre otro e deber ta pa tene cuenta cu aspectonan di salubridad publico, aspectonan di siguridad di cada ciudadano, aspectonan di asilo, ye situacion financiera di pais Aruba, pa menciona algun cos. Como tal, e decision pa habri e frontera ta algo cut tin cu bay den fase, pues no ta una decision cu por worde tuma facilmente.

Importante pa menciona ta, cu di parti di Ministerio di Husticia y Asuntonan Social ya caba a introduci diferente comision cu ta evalua e situacion aki y tin un Justitieel Veiligheidsberaad como tambe un Strategisch Grensoverleg cu ta tene cuenta cu e parti hudicial ye siguridad di nos frontera . Asina por menciona cu danki na e comisionnan aki cu a worde instala, tin un cooperacion mas estrecho entre departamentonan hudicial, cual a haci cu ultimamente nos ta interceptando diferente botonan cu personanan indocumenta abordo cu ta purba di drenta nos isla na un forma ilicito.

Por ultimo, mester menciona tambe cu despues di e crisis mundial di Covid, mester bisa cu e prioridad primordial di Gobierno di Aruba ta pa brinda e ayudo ye sosten na nos ciudadanonan na prome luga pa asina nos por amplia nos capacidad y brinda e ayudo necesario na otronan. Pues, prome cu nos yega na habri e frontera cu Venezuela, tin diferente accionnan cut tin cut tuma luga pero tambe nos tin e deber pa tene cuenta cu consehonan di reino den e caso aki, pa loke ta trata e tematica aki.

Diario Online

Por admin

Deja una respuesta

Tu dirección de correo electrónico no será publicada. Los campos obligatorios están marcados con *